يسري الشرقاوي
مستشار الاستثمار الدولي، و رئيس جمعية رجال الاعمال المصريين الافارقة
عاجبني أوي أوي “شدّة الغُربال” والاداء الميداني للوزارة الجديدة ، كفانا مكاتب واجتماعات ومؤتمرات وندوات ، مصر محتاجه القُرب من ارضها وناسها ومشاركتهم همومهم ، بس نتمني ونتضرع لله تفعيل عنصر المفاجأة في الزيارة علشان نقضي علي البيروقراطية ونعمل زيارات ميدانية ايجابية بجودة عالية ، كفانا الصورة واللقطة والأعمال المعلبة.
ياريت يكون في الزيارات دي ردع للمقصرين، ياريت ننزل بمستوي النشاط للمحافظين ورؤساء مجالس المدن والقري واقسام الشرطة والوحدات المحلية ، محتاجين صحوة ضمير تراقب موظفي الجهات الادارية، تهدْ جبال الثلج البارد في دم موظف حكومة اللي استباح وقت العمل وتشيد وترفع وترقي الموظف المجتهد المهضوم حقه ، تسمع لرجال الأعمال الحقيقيين اللي عاوزين ياخدوا فرصتهم وبيقابلوا الاف المشكلات لكنهم لا حاجزين كراسي ولا بيقابلوا مسؤول في عشاء عمل او اجتماع نوادي وفنادق وكل حياتهم العمل فقط ومحدش شايفهم.
عاوزين زيارات بايدي شريفة تقطع ايد كل لص تجرأ علي المال العام وحق الناس او مد ايده يرتشي ويبتز الطبقة المطحونه ، محتاجين مسئولين كل زيارة ميدانية في مستشفيات يقضوا بالفعل علي قوائم الانتظار ونبطل العداد بتاع الارقام اللي بيتعرض في كل بريزنتيشن علي رئيسنا البطل اللي نفسه يشوفها اد الدنيا وقال ساعدوني يا مصريين ، متبقاش ارقام حبر علي ورق.
محتاجين مسئولي التعليم يكونوا فوق رأس كل مدرس وناظر مدرسة ونرجع احترام الحضور والانصراف للطلاب والمدرسين والعمال و محتاجين ابجديات تضمن وقت وتعظيم كفاءة اداء العمل ،، كفانا مؤتمرات وندوات وبدل و ياقات بيضاء وكرفتات ، محتاجين المسئول الاول والتاني والتالت يسمعوا المواطن مباشرة ويشاركوه افراحه واحزانه واحتياجاته ، دا هو اللي هيصحي فينا روح المشاركة والضمير اللي محتاجينه يستيقظ من ثبات عميق.
مصر محتاجه مسئول حكومي يستمع من كل الطبقات بدون حواجز او نائب او شيخ او ناشط سياسي بيتلاعب باوجاع الناس ، كل ما كان المسئول قريب من الناس كلما نجحنا في السيطرة وحل المشاكل وتهيئة المناخ لرفع الوعي وزيادة الوطنيه.
امتي الاقي مسئول فيكي يا بلد واقف جنب سرير مريض بيخرج الآه من صدره ويعطيه المسئول الدواء .. ياااااه يا بلادي الادارة والارادة نقدر ونستطيع وياريت رجل المرور الحديث بدراجة بخارية ونظام مراقبه حديث يكون قريب من السلوك المروري في الشارع،، والله مصر تستاهل ،،
يارب نستمر وما تكنش نزوة.
