كتبت : روان العمدة
صرح البلوجر نديم بهاء عن بداياته في مجال السوشيال ميديا قائلاً : بدايتي علي السوشيال ميديا فيديو ١٧ ثانيه وكنت عامله عشان بضطر اروح الشغل وبهزر وكده ومره واحده انتشر وانا اصلا كنت في الطبيعي بعمل فيديوهات لأني مكنتش من النوع البيحب يكتب بوستات اوي ولاقيت الناس حباني وبتهزر و قلت ليه لا وكملت و فعلا انا محظوظ جدا مش اكتر .
أوضح البلوجر نديم بهاء طريقة تعامله مع الانتقادات و التعليقات السلبية الموجهة له و تأثيرها عليه حيث قال الانتقاد لو محترم برد وبهزر كمان بس في ناس بتشتم وبتغلط رغم اني طالع اهزر مش اكتر و دول مش بفهمهم الصراحه و اه الانتقادات بتأثر معلش اصلنا بني ادمين فمن الطبيعي نزعل و نتأثر و كان في تأثير بالسلب في حاجات بس ليها ايجابيات كتير حب الناس اكبر نعمه في الموضوع .
كما أوضح البلوجر نديم أن مقاطع الفيديو الفكاهية عبارة عن مواقف عائلية تلقائية قائلاً المواقف و الفيديوهات تلقائيه كلها و ده والله ممكن ناس كتير بتاخد بالها منه اني مش بحب اعمل اسكريبت و امثل موقف انا الكلام بيجي في دماغي بطلع اقوله وبنزل الفيديو .
كما صرح نديم بهاء بعدم رغبته بالاتجاه إلى مجال التمثيل بالرغم من إشادة المتابعين به قائلاً : انا بستغرب لما حد يعمل كومنت ويقولي انت لازم تمثل و ليه امثل مدرستش تمثيل ولا بفهم فيه مش لازم عشان ضحكتك امثل وبالعكس بتدايق لما الاقي ناس علي السوشيال اتجهو للتمثيل لمجرد انهم اتشهرو في حين ان في ناس بجد موهوبه وتستحق ومش اخده فرصتها بس طبعا مش كل الناس في ناس اتشهرت وكانت بتحب التمثيل وموهوبه .
كما عبر عن استياءه و عدم الرضا عن لايفات التيكتوك المبنية على الاهانة حيث قال : في أشخاص كتير محترمه علي التيك توك مش كلهم بيطلعو يعملو الحجات المهينه الي بنشوفها وانا عن نفسي بحب الكلام مع الناس ممكن اطلع عادي اتكلم واهزر بس مش ههين نفسي الصراحه او اهين اهل بيتي مافيش حاجه تستحق ده نهائي بالنسبالي .
كما أوضح وجهة نظره بشأن الدعايا و الاعلان و الهدايا المقدمة للبلوجر قائلاً : الهدايا بتجيلهم علي اساس ايه مش شغل يعني مطلوبين وليهم جمهور وناجحين ليه لا و اظن اي حد لو اتحط مكانهم مش هيمانع لأن الموضوع في الاول والاخر عرض وطلب يعني لو محدش بعتلها هدايا هبكونوا زيهم زي اي حد .
كما صرح نديم بهاء عن سعادته بأبنته ليان و عن دخولها الفيديوهات و حب المتابعين لمقاطع الفيديو الخاصة بهما حيث قال : ليان دي انا معرفش عملت فيا ايه شقلبت حياتي كلها بس للاحسن طبعا ودخولها الفيديوهات مكنش مقصود انا بحب اعمل معاها ذكريات وفرحان بيها انا ماليش صور كتير وذكريات مع اهلي وليان حابب نعمل ذكريات وتشوف ده لما تكبر و دا غير اني بحب اهزر مع الناس وابين لهم مواقف بتحصل معانا علي طول من غير اي تخطيط .
و اختتم حديثه بنصيحة للشباب و متابعينه قائلاً عيش حياتك وشبابك اشتغل واجتهد تمام بس متنساش نفسك وتقضيها شغل وخلاص عشان متكنش زيي لا عملت ذكريات ولا فسح ولا خروجات ودلوقتي حاسس اني قصرت في حق نفسي وفات الأوان اني اعمل كده .
